Tahu Diampek

Dalam adaik minang tasabuik ampek pakaro wajib nan harus dipakai. Ampek pakaro itu iyolah raso, pareso, malu jo sopan.
Jadi "tau diampek" itu artinya satiok urang harus bisa menyatukan kaampek pakaro tadi dalam hiduiknya. kalau ada nan hilang,

rarak kalikih dek mindalu,
tumbuah sarumpun di tapi tabek,
kok habih raso jo malu,
bak kayu lungga pangabek.

Nak urang koto Hilalang,
nak lalu kapakan Baso,
malu jo sopan kalaulah hilang,
habihlah raso jo pareso.

Jadi nampak kalau ka ampeknyo harus sajalan.

Ananda jagolah na ampek pakaro tu, Insya Allah salamaik dunie jo akhirat, Amin.

Buang jauah-jauah sifaik:

Manuhuak kawan sairing,
mangguntiang dalam lipatan,
pilin kacang nak mamanjek,
pilin jariang nak barisi.

hiduik harus dijalani sarupo nasihaik iko :

Bajalan paliharo kaki,
bakato paliharo lidah,
kaki tataruang inai padahannyo
lidah tataruang ameh padahannyo

jadi kalau hanyokaki nan tataruang, Insya Allah capek cegaknyo,
tapi kalau lidah nan tataruang, sabana barek akibaiknyo

Camkan itu Ananda baduo

Right Man on The Right Place

Indak ado ciptaan-Nyo nan sio-sio, kalau ado nan tampak indak baguno, itu pasti dek hati jo ilmu awak nan alun sampai.
Tiok urang punyo labiah, walaupun pasti tiok urang punya kurang.
Tampaikkan urang di tampaik nan cocok, ingek :


Nan tuo dihormati,
nan ketek dikasihi,
samo gadang baok bakawan,
ibu bapak labiah sakali,
baitu jou guru nan maaja,

(baitu harusnyo adaik hiduik)


Nan bungkuak ka tangkai bajak,
nan luruih ka tangkai sapu,
satampok ka papan tuai,
nan ketek ka pasak suntiang,
panarahan ka kayu api,

(pandailah mamakai nan alah ado, "manfaatkan internal resources terlebih dahulu")


nan buto paambuih lasuang,
nan pakak palatuih badia,
nan lumpuah pahuni rumah,
nan patah pangajuik ayam,
nan binguang pangakok kato,
nan pandai tampaik baiyo,
nan cadiak tampaik batanyo, (caliak beda pandai jo cadiak)
nan kayo tampaik batenggang,

"right man on the right place", mungkin itu kato nan awak tahu. Di ranah minang, indak ado urang nan dianggap indak baguno, tiok orang punyo "kelebihan" nan bisa dipagunokan.
Kalau awak jadi pemimpin, indak ado beda antaro nan lumpuah jo nan sehat.

Pemimpin

Pemimpin itu adolah urang nan didahulukan salangkah, ditinggikan sarantiang, tinggi dek dianjuang, gadang dek diamba

Pemimpin ibarat

Kayu gadang di tangah koto,
bapucuak cewang ka langik,
baurek limbago matan,
ureknyo tampek baselo,
batangnyo tampek basanda,
dahannyo tampek bagantuang,
daun rindang tampek balinduang,
tampek balinduang kapanehan,
tampek bataduah kahujanan.


jadi salain jadi 'panutan', pemimpin harus bisa jadi tampaik basanda.
Paralu kadar "ikhlas" nan sangaik tinggi waktu awak diamanahkan untuk mamimpin, harus bisa jadi tampaik basanda, tampaik bagantuang, tampaik balinduang artinya kalau ado nan sadang "rusuah", pemimpin harus bisa manarimo "kaluah kasah"nyo, tantu sajo sarato mancarikan jalan kaluanya.

tapek bana kalau pemimpin harus :

urang nan cadiak candokio,
tahu ereng jo gendeng,
tahu jo kieh kato sampai,
tahu jo ombak nan badabua,
tahu jo angin nan basiru,
alun bakilek lah bakalam,
takelek ikan dalam aia,
lah tantu jantan batinonyo.


Basiaplah untuak jadi pemimpin, mulai dari mamimpin diri awak surang, mamimpin adiak-adiak di rumah, mamimpin kawan-kawan di kelas.
Sairing bajalannyo umua, tangguang jawab awak makin lamo pasti makin banyak. Mulailah jadi urang nan bisa jadi tampek urang bakaluah kasah, jadi urang nan bisa jadi kawan waktu susah. Bantu nan bisa awak bantu.
Awak bisa mulai dari kini dan memang harus mulai dari kini.
Ingeklah kalau tangguang jawab pemimpin iyolah:


Ingek dirunciang ka mancucuak,
dahan ka maimpok,
unak ka manyangkuik,
maminteh sabalun hanyuik,
malantai sabalun lapuak,
ingek-ingak sabalun kanai,
siang dicaliak-caliak,
malam didanga-danga.



Jaan

Harato Pusako (draft)

Tantang harato pusako :

Pulai batingkek naiak,
maninggakan rueh jo buku,
manusia bapangkek turun,
maninggakan harato jo pusako,
harimau mati maninggakan balang,
gajah mati maninggakan gadiang,
manusia mati maninggakan jaso.

harato pusako bulaih di jua atau digadaikan ?

digadai indak dimakan pagang,
dijua indak dimakan bali

Jadi harato pusako indak buliah digadaikan atau dijua, kalau digadaikan indak buliah dipagang atau dibali.
Kecuali (apo bahao minangnyo kecuali ?) kalau ado ampek pakaro :

Maik tabujua tangah rumah,
rumah gadang katirisan,
gadih gadang indak balaki,
mambangkik batang tarandam.